សាររបស់ឯកឧត្តមប្រធានអគ្គនាយក

យើងខ្ញុំមានសេចក្តីរីករាយសូមជម្រាបជូនថា កំពង់ផែស្វយ័តក្រុងព្រះសីហនុ (កសស) ទទួលបាននូវលទ្ធផលអាជីវកម្មគួរជាទីពេញចិត្តក្នុងរយៈពេលប៉ុន្មានឆ្នាំថ្មីៗនេះ តាមរយៈការអនុវត្តទស្សនៈវិស័យជាមូលដ្ឋាន និងទិសដៅអភិវឌ្ឍន៍របស់ខ្លួនស្របតាមគោលនយោបាយរបស់រាជរដ្ឋាភិបាលកម្ពុជា ។ គួរបញ្ជាក់ថាសមិទ្ធិផលទាំងអស់នេះសម្រេចបានដោយសារមានការគាំទ្រជានិច្ចកាល និងការដឹកនាំប្រកបដោយគតិបណ្ឌិតរបស់ សម្តេចអគ្គមហា សេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងអាណាព្យាបាលទាំងពីរ និងក្រុមប្រឹក្សាភិបាលរបស់ កសស ។

ដោយសេដ្ឋកិច្ចជាតិមានការរីកចម្រើនឥតឈប់ឈរ បរិមាណទំនិញឆ្លងកាត់កំពង់ផែកាន់តែមានកំណើនខ្ពស់ ដូច្នេះដើម្បីឆ្លើយតបនឹងកំណើនដ៏ខ្ពស់នេះ កសស បានបំពាក់បន្ថែមគ្រប់គ្រាន់នូវមធ្យោបាយលើកដាក់ទំនិញធុនធ្ងន់ ហើយទន្ទឹមនឹងនេះ កសស នឹងសាងសង់ចំណតផែកុងតេន័រថ្មីមួយទៀត ដែលមានជម្រៅទឹក -១៤.៥ ម៉ែត្រ អាចអនុញ្ញាតឲ្យនាវាប្រមាណ ៨០% នៃនាវាដឹកជញ្ជូនកុងតេន័រក្នុងតំបន់អាស៊ីប៉ាស៊ីហ្វិកចូលចតបាន និងធ្វើឲ្យតម្លៃដឹកជញ្ជូនតាមដែនសមុទ្រមានភាពប្រកួតប្រជែង ។

ឆ្លៀតក្នុឳកាសនេះ យើងខ្ញុំសូមសម្ដែងនូវអំណរគុណចំពោះភាគីពាក់ព័ន្ធ មន្ត្រី បុគ្គលិក និងបងប្អូនកម្មករ កសស ទាំងអស់ដែលតែងតែចូលរួមកែលម្អសេវាកម្មរបស់ កសស ឲ្យកាន់តែល្អប្រសើរឡើង និងប្រែក្លាយ កសស ជាមជ្ឍមណ្ឌលអាជីវកម្មមួយដែលអាចផ្ដល់ផលប្រយោជន៍សម្រាប់ទាំងអស់គ្នារួមទាំងប្រជាជនកម្ពុជា ប្រជាជនក្នុងតំបន់ និងប្រជាជននៅក្នុងពិភពលោក ។